Es til ráðamanna 21.12.14

Ég heyrði af leiguverði í á höfuðborgarsvæðinu í fréttunum fyrir tveim dögum.  Þar var talað um litla íbúð tveggja herbergja, best að ég man. Leiguverðið á mánuði var sagt 185 þúsund krónur.  Ellilaunin mín öll þrátt fyrir lífeyri og bensínstyrk öryrkja duga ekki einu sinni fyrir íbúðarkytrunni einni á Suðurlandi hvað þá meiru. Laun mín fóru úr 163 þúsundum í 168 þúsund við síðustu hækkun og ég hef ekki getað fengið heimilisuppbót sem er um 19 þúsund á mánuði að frádregnum sköttum til síðustu 6 ára þótt svo ég byggi einn vegna þess að ég er kvæntur og konan mín á lífi og verður að búa annarsstaðar og halda þar annað heimili ein upp á sömu bíti og ég þarf að gera.

Þetta er ljóta dótið trúnaðarbrests, eymdar  og óheiðarleika. Ég hef skrifað margítrekað til allra þingmanna landsins ár eftir ár allan þennan tíma,  nema bara núna örfáum útvöldum þetta kjörtímabil til að reyna að fá þá til að breyta þessum ólögum sem ég tel vera svívirðilegt stjórnarskrár- og mannréttindabrot á mér og sjálfsagt fjölda annarra í svipaðri aðstöðu en allt án árangurs. Ég hef orðið að lifa á betli og bónbjörgum vina og vandamanna til að geta haldið heimili mínu og sveitarstjórnin í Fjarðabyggð hefur neitað því staðfastlega skriflega eftir kærur mínar allt kerfið á enda allt til Umboðsmanns Alþingis til að fá einhver svör að hún beri enga ábyrgð á framfærslu minni.  

Til samanburðar þeim launum sem stjórnvöld skammta mér til að lifa á eru læknar sagðir hafa 600 þúsund til 1,7 milljónir á mánuði og geri nú kröfur til að fá 600 þúsund krónur að lágmarki til viðbótar við það á mánuði hverjum og ég segi fyrir mig að ég vildi gjarnan fá það líka en ekki að launin mín verði lækkuð enn meira til þess að þeir einir geti fengið það. Það tel ég að nái ekki nokkurri átt miðað við allt og allt.

En það er bara svona, við lifum í láglaunalandi og misskipting launa landsmanna býður upp á mikla fátækt og hins vegar mikið ríkidæmi og eina tilhneiging stjórnvalda er að moka enn meiru fé í hálaunamenn á kostnað þeirra fátæku sem hafa ekki fyrir framfærslu.  Árið 2011 komst launanefnd skipuð af stjórnvöldum að þeirri niðurstöðu að landsmenn þyrftu að hafa 600 þúsund krónur í kaup á mánuði til að geta lifað mannsæmandi lífi í 10 mánuði.

En svo segja okkur kannanir að stórum hluta landsmanna þyki það bara allt í lagi að ein hálaunastétt í landinu nú hin umrædda læknastétt verði sett á sérkjör sem miðast við laun á hálaunasvæði annarra landa og gefa það eftir að auki og láta taka það af sínum alltof lágu launum til nauðþurfta.  Jú, það þarf ekki að fara með það í launkofa að allur fjöldi landsmanna eru fífl. 

Það sést best á því að það skuli kjósa yfir sig sömu trúnaðarfulltrúana í stjórnmálunum og svikið hafa þá aftur og aftur ár eftir ár en svona vitlaust fólk og með svona mikla sjálfseyðingarhvöt sætti ég mig illa við að skuli vera til í landinu, til að eyðileggja fyrir öðrum en verð að taka því jafnt sem fulltrúunum þeirra sem hafa ekki einu sinni getað bætt mér upp mikla launaskerðingu út af kreppunni, sem var það fyrsta á afrekaskrá Árna Páls á ráðherrastóli  

og þeir hafa þó bætt sjálfum sér fyrir löngu síðan og öðrum hálaunamönnum að fullu ásamt ýmsum fríðindum til uppbótar aukalega. Skyldi það furða nokkurn mann sem ekki er orðinn alveg þrældrepinn af ástandinu og langvarandi níði á sér að þeir sem orðið hafa fyrir barðinu á þvílíku óréttlæti aftur og aftur á langri öryrkja og fátæktarævi eins og t.d. ég hafi fyllist ógeði og fyrirlitningu á slíkum vesalmennum.

Svo ég tali nú ekki um verkalýðsforustuna sem spáir bara í verðbólguna og stöðuleikann og reynir af alefli að þóknast stjórnvöldum og halda launum umbjóðanda sinna víðs færri öllu rauhæfu miðað við þarfir þeirra og laun annara þegar kjaramál lálaunafólks eru á dagskrá en aldrei minnst á slíkt þegar þeir sjálfir og aðrir hálaunamenn eiga í hlut og þeir eru þrautsetnir í störfum sínum þrátt fyrir að upp komist um svik og svínarí eins og sagt hefur verið með Gylfa Arnbjörnsson að gefa bönkunum hundruð milljarða víðs vitandi á kostnað landsmanna. 

Ég get ekki að því gert að þegar ég skrifaði þessar síðustu línur þá flögraði í huga minn og lái mér það hver sem vill í öllum þeim bófahætti sem við fáum að kynnast, að því hefur verið haldið fram af spekingum þeim er telja sig þekkja vel til fjármálabransans að öllum hinum vestræna heimi sé að meira og minna leiti stjórnað með mútum og það getur verið býsna gott uppúr þeim að hafa en eðli þeirra er þannig vaxið að menn kannast ógjarnan við þær og ég spyr því sjálfan mig þeirrar samviskuspurningar:

Hvað aðstæður aðrar en himinháar mútur hefðu getað fengið sjálfan mig til að svíkja svo blygðunarlaust og gjörsamlega mína umbjóðendur í trúnaðarstarfi? En ég er ekki einhver annar og ekki gott að dæma fyrir aðra. Og svarið er: Ég bara veit það ekki. En eitt er þó víst hvað sem öðru líður að um allan heim, hafa atkvæði alla tíð gengið kaupum og sölum á milli aðila.

Hugsjónastarf 21.12.14

Læknum er horfið sitt hugsjónastarf

en hafa fengið annað í staðin.

Nú er það Mammon sem mata víst þarf

og mikill er af honum skaðinn.