Elli heitinn, minning 5.4.18

Fyrr á árum en þó í minni tíð en ég er 75 ára, bjó maður í Neskaupstað sem fluttist þangað frá Mjóafirði sem var kallaður Elli heitinn. Viðurnefnið ku hann hafa fengið af því að einu sinni leið yfir hann. Hann er sagður þá hafa verið staddur út á Bakkabökkum. Ekki segir sagan af því hve öngvitið stóð lengi en hann sagði svo tíðindin að hann hefði fengið snert af bráðkveddu. Elli var mjög sterkur maður. Haukur bróðir hans sem var sterkur líka, sagði mér að Elli tæki fullum fetum 200 lítra bensíntunnur á löggunum ofan af bílpalli í fangið og labbaði með þær hvert sem væri til að setja niður. Haukur sagðist líka taka tunnur niður á þennan hátt án þess að láta þær detta. Móðir þeirra var sögð hafa tekið 200 punda mjölpoka undir hvora hendi úr bátnum þeirra og labbað með þá á hálu fjörugrjótinu eins og fara gerðist. En 200 punda poki sem kallað var er sama og 100 kíló og undir hvora hendi, geri aðrir betur…

Ljósmæður og lémagna ráðherrar 5.4.18

Það kannast sjálfsagt flestir orðið við forsætisráðherrann úr liði vinstri grænna, Katrínu Jakobsdóttur

en kannski síður við annað vesælmenni flokksins sem fer með heilbrigðismálin Svandísi Svavarsdóttur.

Eitt sýnishornið af ódrengiskap þeirra er að sitja hjá eins og þeim komi það ekki við og neyða ljósmæður til uppgjafar og uppsagna út af launamisrétti sem þær eru og hafa verið beittar lengi á svívirðilegasta hátt:

 

Ljósmæður með röfl og rigs

ráðast á misréttis fúlan pytt.

og ráðherrann er núll og nix

sem nægir bara fá kaupið sitt.

 

- Þetta er allt til háborinnar skammar og engu lagi líkt en alltaf eru einhverjir sem ekki kunna að skammast sín eða er svo annt um eigin hagsmuni að þeir telja sig ekki hafa efni á því...