Ég er kinký 2013

Í erótík notarðu eina fjöður

og eðals drekkur mænuna

en ég er kinký og ástamöður

svo alla nota ég hænuna.

Á sjötugsafmælinu 2012

Sumra vill lífið standa í stað,

stigana aðrir klifa.

Mannslíf þess tel mislukkað

sem megnar því ekki að lifa.

 

Sækir gleði að sáttum anda

synd að gráta verjast mátt.

Forðast vinur fortíðarvanda

fær sá margan leikið grátt.

 

Ég mátti lengi án gleði gista

gráti nær en tjáningum.

Það er eins og leið til lista

lúti oft miklum þjáningum.

 

Í núinu lifum. Nótt er oft svört,

nöldrum ef róa þarf í gráðið.

Að frantíðin verði farsæl og björt

við fáum víst litlu um ráðið.

Af heimsspeki Alla granna 2012

Margt hefur spakur

orðað til álita

sem ætla ég milli hluta

að láta vera:

- Að heimurinn sé gerður

fyrir hálfvita

svo hafi þeir

eitthvað að gera

að manninn sé lengi búið

að afvegaleiða og ginna

með lygum milli tanna

og æðri sannleik                                                              

sé ekki að finna

en skilninginn

á firringu manna.

Vor blessaða vinstri stjórn 2012

Vor blessaða vinstri stjórn

berst á við tvo,

- að bjarga því öllu

sem bjargað hér verður

en það er ekkert auðvelt,

segir hún svo,

Sjálfstæðisflokkurinn

er svo illa gerður!

Hver er sjálfum sér næstur 2012

Það hefur raun yfir þjóð vora leitt

og þar ætti flesta að skjóta,

endalaust talað en ekki gert neitt

aumustu þegnum til bóta

en sér hefur Alþingi af örlæti veitt

og ausið í fjárglæfraþrjóta.

Öfgarnir 2013

Af ógeðslegu ýmis gubbar,

yndissnauð er fylking körg.

Skítapakk og lygalubbar

leika hlutverk æði mörg.

 

Ómenni um alla jörð

öfga sína leiða strítt.

Staffírug vor stjórnarhjörð

staðhæfir að svart sé hvítt.

 

Stjórnin þessi er gáskagleið

en glötuð öllum mergi.

Mun henni vera mörkuð leið

milli einskis og hvergi.

Á eina lund 2013

Allt hér í veröld er á eina lund

einhver að kúska annan sem hund.

Illt er að klikka á elleftu stund

og átakanlegt er lokast öll sund.

 

Mér líkar illa að ganga á glóðum

og geta ei sagt nema ,,sjitt”!

Ég hef reynst góður með góðum

og gjarnan með hinum hitt.

 

Þótt elskaði friðinn oft að mér skaust

óþverri og níð, sem kenna á ég fékk.

Margt hefi fjallað um tæpitungulaust

um tíðarandann og hverrnig til gekk.

 

Lundin mín brast ljótur var skaðinn

lá ég mest flatur og kvalinn um ár.

Hjartað fór óvegu fitu varð hlaðinn

fá brot ei gróið þótt líði mér skár.

 

Ég fékk að kynnast hrottunum hálum,

hundar og ómenni skóku mína storð

en ég hef oft langtímum setið á sálum

saurugra fanta er þoldu ei mín orð.

 

Heimurinn færir oss yndi og þraut

sem ýmist eru að koma eða fara.

Frægðin er hverful og hverfur á braut

en hjartasár að eilífu vara.

Öryrkjar í skeyni 2013

Það finnur enginn til í annarra meini,

enginn veit hvenar sjúkdóm að ber.

Alþingið vill hafa öryrkjana í skeyni

og ala þá bara á skítnum úr sér.

Það eiga allir sín takmörk

Það eiga allir sín takmörk til góðs,

elskulegheitin títt vilja þrjóta.

Það er léttast að leggja til hnjóðs,

ljúga, stela, svíkja og blóta.

Lyddur á mannlífið leita til blóðs

og ljóma er sjá mann kvaldan.

Það eiga allir sín takmörk til góðs

en óþverran þrýtur sjaldan.

Nýárspistill Svarra 2013

Göfug markmið

Það er göfugt markmið að gera sitt besta,

ganga braut lífsins með kærleik í hjarta

að reyna af íturð ei fögrum málum fresta,

feta veg réttlætis það má hvern skarta.

 

Um þjóðfélagið

Að rétta af þjóðlífið sækist mjög seint

af syndum hér fátt eitt talið.

Harðvítugt glæpalið ljóslega og leynt

hefur logið og stolið og falið.

 

Almúginn segir, ei þingmönnum þakkið
þeir hafa ekki unnið mér eða þér
því þar hefur stöðugt allt helvítið pakkið
verið að hlaða undir rassana á sér. 

 

Aumingjar hafa á ýmsum stöðum setu

og ei gott að vita hver reynist skást.

Þegar menn hafa ekki þroska eða getu

þýðir víst lítið um það að fást.

 

Ei leyfist öryrkja að seðja sinn svang
af sóðum er jafnóðum rúinn
og heimskan verður að hafa sinn gang
hún er af mönnum til búin.

 

Marga vantar mat að borða
mega þola skort og pín.
Ríkisstjórn kann þar eitt til orða:
,,Þeir ættu bara að skammast sín”!

 

Það er bágt í þurrum hópi

þjást og finna til,

ætti ég bara ögn af dópi

algleymis nyti um stundarbil.

 

Hlúum að

Ástin og fegurðin oss megi nær,

uppmögnum gleði og losta.

Elskum og hlúum að öllu sem grær,

yndið við tökum til kosta.

 

En yndis ef njóta eigum við

ýmsu þarf gera skil.

Það er fátt svo fullkomið

að fáist ei lagað til.

 

Sefjun

- Nýju fötin keisarans, eru glettnisgrá
geislabaugs þótt ríki stundarfriður.
Siðferði er haldið uppi ofan frá
og einnig líka þaðan mulið niður.

Veslings barnið skyldi ekki ljótan leik
er lostnir sefjun reyndar aðrir gengu.
Undarlegar hnippingar þá komu á kreik:
,,Sjá keisarans hátign stendur þarna í engu”!

 

Skoðanir

Skoðunum vilja ýmsir aðra svipta

oft þar kveður fast við ramman reip.

Fljótur er vitur furðu oft að skipta

en flónið situr fastast við sinn keip.