Sáumessa Svarra 3. í jólum 2012

Hjá Alþingismönnum er æran flest ring,

ámátlegar hjarðsálir slá um þá hring.

Þótt Kristur vor Jésú hér kæmist á þing,

knésetja hann myndu sem vitleysing.

Til lista veitt 27.12.12

Þeir sem að þjást og þrauka í Hel

þeim er oft til lista veitt

en þeim sem í lífi líður vel

ljósast ekki spá í neitt.

Konuefnið

Vandi er sér að velja konu,

vitur sagði fyrir skömmu:

- Ef í stúlku áttu vonu,

ættirðu að líta á tengdamömmu.

Í alvöruleik

Þeir sem víða vaða reyk

vilja brenna inni.

Við erum öll í alvöruleik

en ekki í þykistunni.

Brókaleppar jólanna

Best er að hafa í brókum leppa

ef buna vill þitt skott

sem heldur er skárra en hæðarteppa

en hvorugt þykir gott.

Bestur mun þó í brókum vera

bústinn og góður kýll

- það má helst úr býtum bera

að berist þér kvennadíll.

Jólahugvekja 23.12.12

Að mega njóta er mikilsvert

og megna að leysa hverja þraut

að vekja ástir og yndi hvert

er æðsta hnoss á lífsins braut.

Þjóð í öngum sínum 18.12.12

Bágt er nú ástand í borgum og dölum

búið á sálunum fólk löngu er,

menn eigra á klósett í Alþingissölum

og erindið er til að farga sér.

Gefðu vinur 17.12.12.

Þótt heiminn byggi hóparnir af nöðrum

þá hafa flestir gæði til að bjóða af sér.

Það er gefandi að geta hjálpað öðrum,

gefðu vinur ætíð part af sjálfum þér.

Óhöpp 16.12.12

Óhöpp þótt ei öðrum bæti

ýmsa gleðja má,

enginn vex þótt annan græti

illska er döpur þrá.

Það er skárra að vanga væti

en villi þokan grá,

- betra að hafa of mörg sæti

heldur en of fá.

Morgunbæn

Góðan daginn gef oss nú

Guð sem öllu ræður,

yndi besta af ást og trú

anda í lífsins glæður.